عروسة مستحية وعريس معجوول !!

السلام عليكم ورحمة الله وبكراته

اليوم لقيت قصة عريس وعروسطو المخضرمين
وايش صاار لهم في أول مشوار بعد العرس والزفة
نبدأ

هذا واحد توه معرس وخلصت الزفه والامور اللي باالقصر .....

اخونا في الله شغل[اخذ حرمته] وركبوا السياره..ودعس للقصيم

يعني اهل العروسه في الرياض وهو ساكن في القصيم.

والبنيه تستحي ومقررررطه طوول الطريق ...والرجال ماغير يسولف ويهذر والبنيه

ساكته...مااحولك احد

الرجال يأس من البنت انها تكلم ..وقال ياولد ماوراه هذره اشغل المسجل وامسسك

الخط....

في الوقت نفسه البنت كانت محصوره تبغا الحمام ومتوهقه انها بس تتكلم عشان تقوله

ابي الحماااام الله يكرمكم

عاد هي طمررت على المرتبه اللي ورا عشان تنسدح ويخف عليه الوجع

الين يوصلون لمحطه

المهم الرجال ماوعى الا وهاذيك محطه ويصفط عندها

وينزل للبقاله ياخذ له كم كيس فصفص وكم علبة بيبسي للطريق

هو كان وده ياخذ له شريط يسليه بالطريق بسس خبركم

مايصلح يشغل شريط والافضل يخليها سواليف

البنت على نزلت زوجها الا وتقز هاذيك الحمامات حقات الحريم

اللي عند المسجد اللي جنب البقاله

قالت لنفسها يابنت يمديني اطمر واخلص وارجع قبل لايرجع هو من البقاله

المهم المسكينه راحت واخذت وقتها

اخونا في هالوقت قد رجع للسياره وعلى باله مرته في المرتبه اللي ورا

وخبركم عبايه سودا واخر الليل ماانتبه انه مهيب فيه السياره وهو شغل

ودعسسس

البنيه المسكينه طلعت وهي مرتااااااحه

وتناظر يابنت وين السياره .......وتتلفت ماتشوف غير اللي يشتغلون في المحطه

عاااااد تخيلوا الصدمه يوم عررفت ان زوجها دق سلف ومشى. ..جالسه تتأمل

المسكينه في نفسها يمكن راح منا ولامنا وبيرجع

شوي ماوعت الا ذاك الجمس المقبل يوم وقفوا عندالبقاله اللي جنبها

وتقز الحريم اللي في الجمس .....قالت زيييين عائله وتروح وترمي نفسها على

الحرمه اللي قدام

وهي ام العيله وتقولها خالتي اناداخله على الله ثم عليك..وهذي قصتي

والعجوز تمسك راسها وتقولها..يابنيتي انتي تعرفين سيارة زوجك

ويعبون بانزين ويدعسون وراااااه

نعود الان لصاحب الفصفص

اخونا في الله مريح وماشي...بعد مالقوه على بعد نص ساعه

عاد تخيل عزيزي القارئ انك على طريق القصيم وفجأة وراك

جمس يكبس بالنوربشكل مخيف يبيك توقف وش ردة فعلك

اكييد الرجال دعس قال ذولا مهابيل بيضروني ومعي عروستي

........ويافشيله اذا انطقينا................

والجمس وراه داعس يحاول انه يوقفه المهم اللي يسوق الجمس عرف وش

يسوي ...فقام يولع نور الجمس اللي داخل عشان يشوف انها عايله

واخيرااااااا ..انتبه ووقف يبي يشوف وش عنده

ونزل معصصصصصصصصصصب. .....

عاد من اللي متوهق في هاالموقف....راعي الجمس

قول في نفسه شلون اقوله ان مرته معنا

يبي يجبها بااسلووووب تدريجي عشان ماينصدم ..خبركم في مثل هالمواقف

شبيقولون اهل العروسه

اخذت بنتنا وضيعتها ..والللللله ان تلزق فيك السالفه طول عمرك

والعالم يتمشون وماعندهم سالفه غيرك

المهم راعي الجمس سلم وقال يااخوي ماكاانك مضيع لك شي ......

قاله المعرس لا ماضيعت شي

قال متأكد

قال المعرس...شلون

قال راعي الجمس رح طل في سيارتك شف فيه شي ناقص لك

العريس قام يوسوس حتى المشكله مرته ماجت على باله

المهم راح ودخل سيارته وقال يامره فيه شي طاح منن وحنا في المحطه

محد رد عليه

ويوم لون وجهه بدا يميل للكرت الاحمر ....وييييين راحت المره

ورجع لراعي الجمس وقال هات السالفه

قال ياولد مرتك لقيناها في المحطه انا واهلي وقالت لنا انها نزلت

للحمام وانت مشيت ولا دريت عنها

عااد العريس كل انواع النفضات نزلت عليه تلعثم ولاقدر يتكلم

المهم راعي الجمس راح وقال للعروسه يلاطسي عند زوجك

شوفيه متصومع عليك

المهم العروسه اركبت مع زوجها السياره وانطلق لسانها اللي كان مربوط

وقامت تتعذر له...

وتقول لاتزعل مني اناكنت مستحيه اقولك اني ابي الحمام..وانت مشاء الله عليك

ركبت السياره وانطلقت .........

ههههههههههههههه<===ياشين التميلح..توها تتميلح..عادانقلب الوضع

صار العريس هو اللي مبرطم طول الطريق

والعروسه هي اللي تبربر

مابقى الاتسووووق عشاااان اخينا في الله مرتاح من اللي حصل...

طويلة .. بس حلوة

منقوووووول

رد: عروسة مستحية وعريس معجوول !!

سلمووووووووووووو يا بوسيف طويلة بس حلووووووووووة تسلم ياغالي

رد: عروسة مستحية وعريس معجوول !!

يحلي ايامك دمت بود وحب

رد: عروسة مستحية وعريس معجوول !!

تسلم ابو سيف حكاية جميلة

رد: عروسة مستحية وعريس معجوول !!

حيى وسهلااا

رد: عروسة مستحية وعريس معجوول !!

منور صفحتي